English
Македонски
Srpski
Hrvatski
Slovenščina
CrnogorskiFinelevate360 и ФЕИТ потпишаа договор за соработка
Finelevate360 и Факултетот за електротехника и информациски технологии (ФЕИТ) при УКИМ електронски потпишаа договор за соработка. Тие одржаа и работна средба со деканот, проф. д-р Владимир Атанасовски, на која ги испланираа идните заеднички активности.
На средбата, Виктор Крстевски, основач и извршен директор на Finelevate360, ја нагласи важноста на поврзувањето на академијата, индустријата и финансискиот сектор за развој на практично знаење, дигитални вештини и иновации.
Во рамките на соработката, Finelevate360 и ФЕИТ ќе работат на заеднички настани, стручни предавања, работилници, истражувачки активности, презентации и иницијативи што ги поврзуваат студентите со вистинските предизвици на индустријата.
Активностите ќе бидат насочени кон дигиталната трансформација, дигиталниот идентитет, услугите од доверба, податоците и интелигентните платформи, дигиталните канали, сајбер безбедноста, вештачката интелигенција, автоматизацијата и примената на модерни технологии во финансискиот сектор.
„Finelevate е создаден како платформа за забрзување на дигиталната трансформација преку знаење, соработка и навремено препознавање на промените. Соработката со ФЕИТ е особено важна затоа што го поврзува академското знаење со вистинските потреби на индустријата и создава простор студентите, професорите и компаниите заедно да работат на теми што ќе ја обликуваат иднината“, изјави Крстевски.
Со ова партнерство Finelevate360 продолжува да ја гради својата годишна програма на дијалог, истражување и соработка меѓу академијата, финансискиот сектор, технолошките компании и институциите.
